Ұлттық ауруханада инфрақұрылымды жаппай жаңғырту басталды

Қазақстан Республикасы Президенті Іс Басқармасы Медициналық орталығының ұлттық госпиталі жаңа медициналық корпустарды кезең-кезеңімен салуды және инфрақұрылымды кешенді жаңартуды көздейтін ауқымды жаңғырту жобасын іске асыруды бастады.

Жобаны іске асыру қажеттілігі 1950–1970 жылдары салынған ғимараттарға жүргізілген техникалық тексерулердің нәтижелерімен байланысты. Сараптама жекелеген нысандардың физикалық тозуының жоғары деңгейін, сондай-ақ олардың қауіпсіздік, сейсмикалық төзімділік және емдеу процесін ұйымдастыру бойынша қазіргі талаптарға сәйкес келмеуін көрсетті.

Жаңарту аурухананың қызметін тоқтатпай, кезең-кезеңімен жүргізілетін болады. Профильді бөлімшелерді басқа медициналық ұйымдарға ауыстыру жоспарланбауда, ұжым толық көлемде сақталады, ал пациенттерге медициналық көмек штаттық режимде көрсетілетін болады.

Құрылыстың бірінші кезеңі 2026 жылы басталып, 2028 жылы аяқталады. Жобаны толық іске асыру 2029 жылға дейін жоспарланған.

Жаңғырту нәтижесінде Ұлттық аурухана жаңартылған операциялық бөлмелері, жоғары технологиялық жабдықтары, жайлы палаталары және медициналық процестерді басқарудың цифрлық жүйелері бар заманауи көп бейінді медициналық орталыққа айналады.

«Аурухананы жаңғырту медициналық көмекті одан әрі дамыту және заманауи емдеу стандарттарын енгізу үшін қажетті қадам болып табылады», — деп атап өтті ҚР Президенті Іс Басқармасы Медициналық орталығының ұлттық госпиталінің директоры Асхат Бралов.