Техникалық прогрестің адам өмірі үшін маңызы өте зор, бірақ ол тәуелділікке апарады. Бұл жайлы Ұлттық госпитальдің жалпы тәжірибелік дәрігері Іңкәр Мұқаш былай дейді:
-Фаббинг – зиянды әдет. Әлеуметтік желіге және гаджеттерге тәуелділік адамның телефонды қолынан тастамағандығынан байқалады. Ол басқа адаммен қарым-қатынас кезінде телефонға қарай береді, әңгімелесуші адамнан , мұғалімнен, әріптестерінен алшақтайды, оларды елемейді. Номофобия –ұялы телефоннан ажырап қалу , немесе оның үйде қалуынан, жоғалуынан аса қатты алаңдаушылық және мазасыздықтың пайда болуы. Номофобтар ұялы телефоннан аса қауіпті, тіпті күлкілі жерде, көлік жүргізгенде , жуынатын бөлмеде, тамақтану кезінде, тіпті дәретханада да ажырамайды.
Психологтарды тағы бір тәуелділік алаңдатады, бұл – әлеуметтік желілерге тәуелділік. Кейбiр адамдар, әсiресе балалар мен жасөспiрiмдер, шынай өмірге, қоршаған ортаға қызығушылығын жоғалтып, қарым-қатынасын шектейтiн, басқа әлемде өмір сүре бастайды.
Дәрігер Іңкәр Мұқаш тәуелділіктің физикалық салдарына : көздің көруінің төмендеуі және экран алдында сағаттап отыру, жарық пен ұсақ әріптер компьютерлік көру синдромы жататынын айтады. Ол көздің құрғауы, тітіркенуі және көрудің нашарлауы секілді белгілерден байқалады. Остеохондроз, омыртқаның қисаюы. Гаджетті ұзақ уақыт пайдалану кезінде мойын, арқа, белде ауырсыну пайда болады. Протрузия мен омыртқа жарығына, жергілікті қан айналымының бұзылуына ықпал етеді –дейді дәрігер . Психикалық салдары: Оқшаулану. Гаджеттерге тәуелділік жалғыздық пен күйзеліске әкеледі. Ұйқының бұзылуы. Ұйықтар алдында гаджеттерді пайдалану көк жарықтың мелатонинге әсерінен ұйқысыздыққа әкелуі мүмкін. Күйзелістің жоғары деңгейі. Үнемі хабарласу және «байланыста» болу қажеттілігі алаңдаушылық пен күйзеліс деңгейін арттырады. Есте сақтау қабілеті төмендеп, бас ауырады. Гаджеттерге тәуелділіктің денсаулыққа айтарлықтай зиянды әсері бар. Оны пайдалану барысында уақытты шектеп, физикалық және психикалық салауаттылыққа назар аударған жөн. Тұрақты үзілістер мен белсенді өмір салты тәуелділікті азайтуға көмектеседі.
