Қазақстанда 282 мың медицина қызметкері бар, олардың ішінде 83 мыңнан астамы дәрігерлер. Дәл осы күндері оларды бүкіл ел бойынша құттықтап жатыр. Соған қарамастан, халық санына шаққанда олардың саны әлі де жеткіліксіз.
Елімізде терапевттер, хирургтар, педиатрлар, гинекологтар және анестезиологтар тапшы. Ал стоматолог мамандығына конкурс көптеген жылдар бойы ең жоғары деңгейде қалып отыр, бұл мамандық Қазақстандағы ең сұранысқа ие кәсіптердің бірі саналады. Өткен жылы медицинаның осы саласының табысы рекордтық 209 миллиард теңгеге жетті.
— Бұл шынымен де ең танымал әрі ең қымбат салалардың бірі, — дейді Ұлттық госпитальдің хирург-стоматологы Сергей Рой. — Адам тіс ауруына төзбейді, ал сау тістер ең алдымен адамның келбеті мен күлкісі, көзге бірден түсетін нәрсе. Тістердің сапасына қарап ел экономикасына баға береді. Қазақстанда бұл жағынан бәрі жақсы. Еліміздің кез келген өңірінде адамдар тістерін емдетуге асығады, өйткені қазір бұл ауыртпай және тез жасалады. Кеңес дәуіріндегі стоматологияда құрылғылардың жылдамдығы жүз есе төмен болатын, ал жансыздандыратын дәрілер мүлде болмағандықтан, адамдар бізден қорқып, қабылдауға жазылуды кейінге қалдыратын.
Стоматологтардың өздері де көңілді жандар. Кем дегенде, студенттік КВН ойындарында олардың командалары әрдайым алдыңғы қатарда болатын. Ал Сергей Рой бала кезінде тергеуші болуды армандаған, бірақ сынып жетекшісі оны бұл ойынан қайтарған. Химия, биология және математикадан үздік баға алған баланы полицияға жіберуге қимаса керек.
— Мен медицина факультетіне түсе алмадым, сондықтан стоматология мамандығы бойынша колледжге түстім, кейін бәрібір хирург мамандығын меңгердім. Ол кезде стоматология факультеті ең жеңіл факультет саналып, оған көбіне нашар оқитындар немесе салақ жастар түсетін. Әрине, нейрохирургтар мен кардиологтармен салыстырғанда оқу жеңілірек болды, бірақ бүгінде біздің мамандығымыз көшбасшылар қатарына шықты. Бәлкім, оның себебі — біз адамдарға күлкі сыйлап, ауырсынудан тез арылуға көмектесеміз.
